بالصدفة بس دخلت على الصفحات دي.. و بتلقائية و سذاجة لاقتني باعمل لنفسي بلوج.. و مشيت خطوة خطوة لغاية ما لاقيت نفسي ممكن أكتب حاجة ! إيه هي الحاجة دي مش عارف.. طاب مش مشكلة.. مين هايقرا اللي أنا كاتبه..تقريبا مافيش حد هايقراه ! عادي.. طاب أنا عملته ليه أصلا طالما أنا مش عارف أكتب فيه إيه ولا هاكتب لمين ؟!! بجد مش عارف
عموما أنا فعلا بقى ليا بلوج و ممكن أكتب فيه أي حاجة ، و أعتقد إني هاسيبه كده للزمن.. كل ما احس اني عايز أفضفض أو أقول أي حاجة لأي حد هابقى أكتبها هنا.. ربما حد يقراها في المستقبل القريب أو البعيد
تعرفوا ؟! الموقف ده فكرني بحاجة كده بسيطة كنت كتبتها قبل كده في موقف مشابه.. أقولهالكم بقى مادام مافيش حاجة أصلا في الموضوع:
أكتب؟! أكتب عن إيه.. و كلامي عن مين و ليه
أكتب سطر و ألاقيه.. مش قد كده أروح شاطب
و كلامي مالوش تبرير.. أنا هاكتب رغي كتير
و ده عجز عن التفكير.. هو انا مجنون أو شارب
لو هاكتب كده بالنية.. بإيديا المستنية
هاكتب تخاريف فنية.. لو حابب أو مش حابب
لو هاكتب لازم أفكر.. بقلم إسود ولا احمر
بقلم بيك ولا بباركر.. ياه ده انا مش عارف أجاوب
لو سن قلمي إتكسر.. و فكري كله إنحصر
فكلامي راح يختصر.. على تهليس و كلام خايب
جربت أكتب مانفعش.. يا محمد ماتطولش
قولها على طول في الوش.. طاب و الله مانا كاتب
